‘ह्वाइट सन’ फेम्ड निर्देशक दीपक रौनियार निर्देशित चलचित्र ‘पूजा, सर: राजागञ्ज’को पोस्टर सार्वजनिक गरिएको छ ।
चैत १ गते रिलिज हुने चलचित्रको निर्माण टिमले आज सार्वजनिक गरेको पोस्टरमा चलचित्रका प्रमुख पात्रहरु फिचर्ड छन् ।
चलचित्रको कथा एक सांसदको छोरा सहित अन्य दुई बालक अपहरणमा परेको घटनामा केन्द्रित छ, जसलाई मुक्त गराउन प्रहरीले सञ्चालन गरेको खोजी अप्रेसनलाई चलचित्रले चित्रण गरेको छ ।
सार्वजनिक पोस्टर हेर्दा अभिनेता दयाहाङ राई दयाहाङ प्रहरी एसपीको पोशाकमा देखिएका छन् । कुनै घटनाका लागि तयार रहेको प्रहरी टोलीजस्तो देखिएको छ ।
यस चलचित्रमा आशा मगरातीले प्रमुख भूमिका निर्वाह गरेकी छन्, भने दयाहाङ राई, निकिता चाण्डक, ऋचा शर्मा, पुष्पा यादव, विजय बराल, गौमाया गुरुङ, आरती मण्डल, घनश्याम मिश्र, परमेश्वरकुमार झा, पशुपति राई, र नीरज श्रेष्ठ लगायतका कलाकारहरूको अभिनय रहेको छ ।
यो सिनेमालाई ‘द न्यूयोर्क टाइम्स’ले हेर्नुपर्ने ९ नव-निर्देशकको सूचिमासमेत राखेको थियो । चलचित्रको निर्माणमा आदि फिल्मस्का तर्फबाट निर्देशक रौनियार र अभिनेत्री मगराती, बासुरी फिल्मस्का तर्फबाट रामबाबु गुरुङ र मनिराम पोखरेल तथा तन्हाउसर गेटका तर्फबाट एलन आर मिलिगनले सहकार्य गरेका छन् ।
निर्देशक रौनियारका अघिल्ला दुई सिनेमा ‘हाइवे’ र ‘ह्वाइट सन’ समीक्षात्मक रुपमा अब्बल ठहरिएका थिए । सन् २०१७ मा चर्चित अमेरिकी अखबार न्यूयोर्क टाइम्सले दीपकलाई हेर्नै पर्ने विश्वका ९ निर्देशकहरुको सूचीमा राखेको थियो । उनले विश्व प्रतिष्ठित लोकार्नो, सिड्नी जस्ता फेस्टिभलमा जुरीको भूमिका समेत निभाइसकेका छन् ।
यो चलचित्रको फ्रान्स, जर्मनी, स्विजरल्यान्ड, बेलायत, आयरल्यान्ड जस्ता देशका लागि महंगो मूल्यमा प्रदर्शन अधिकार बिक्री भइसकेको छ ।
