प्रेम दिवसको अवसर पारेर आगामी फागुन २ गतेबाट प्रदर्शनमा आउन लागेको चलचित्र ‘दुखी आत्मा’ को ३ मिनेटभन्दा लामो टिजर सार्वजनिक गरिएको छ ।
दीपेन्द्र लामाको लेखन तथा निर्देशनमा बनेको यो चलचित्रलाई हिमाल कडरियाले निर्माण गरेका हुन् भने सुदिप ढकाल कार्यकारी निर्माता रहेका छन् । सिनेमामा आलोक शुक्लाको छायांकन र निमेष श्रेष्ठको सम्पादन रहेको छ।
सार्वजनिक टिजरमा मुख्य दुई कलाकारहरू दयाहाङ राई र आँचल शर्मा हाबी देखिन्छन् । एडल्ट विषयवस्तुमा आधारित यो सिनेमामा द्विअर्थी संवादहरूको प्रयोग गरिएको छ, जसले दर्शकलाई हास्य रसमा भिजाउने प्रयास गरेको छ । टिजरमा आँचल शर्माका संवादहरूले चलचित्रको विषयवस्तु अझ प्रस्ट्याएको छ ।
चलचित्रमा दयाहाङ राईले रोमान्टिक तर पीडित पात्रको भूमिका निर्वाह गरेका छन्। यो सिनेमाको टिजरमा दयाहाङको पात्र इरेक्टाइल डिसफंक्शन (नपुंसकता) को समस्याबाट ग्रसित देखिन्छ । ‘एडल्ट ड्रामा’ का रूपमा चित्रित फिल्मको टिजरमा आँचल शर्माले कामुक हाउभाउ प्रस्तुत गरेकी छिन्, भने संवादहरू प्रायः दोहोरो अर्थ लाग्ने छन्।
टिजरले दयाहाङको पात्र पीडा भाव केही झल्काए पनि सम्पूर्ण कथा भने ट्रेलरमा खुल्ने अपेक्षा गरिएको छ ।
सिनेमामा अनुप विक्रम शाही, बुद्धि तामाङ, रेअर राई, पुष्कर गुरुङ, कविता आले, लोकेन्द्र लेखक, आरती आचार्य, आशान्त शर्मा, दिया मास्के, लुनिभा तुलाधर, र शिशिर वाङ्देल जस्ता अनुभवी कलाकारहरूको अभिनय रहेको छ।
क्लक वर्क क्रियशनको ब्यानरमा निर्माण भएको यो सिनेमाले हास्यरस र प्रेमकथाको सम्मिश्रण दर्शकलाई हलसम्म तान्ने देखिएको छ।
सार्वजनिक टिजरले सिनेमाप्रति दर्शकको उत्सुकता अझ बढाएको छ । अब, ट्रेलर र फिल्मले कस्तो प्रभाव पार्ने हो, त्यो भने हेर्न बाँकी छ ।
