काठमाडौं । चलचित्र ‘महाभोज’को मंगलबार बिहान काठमाडौंको कमलादीस्थित गणेश मन्दिरमा शुभ मुहूर्त गरिएको छ । मुहूर्त पूजा कार्यक्रममा चलचित्रका कलाकार, प्राविधिक तथा निर्माण टिमको विशेष उपस्थिति रहेको थियो ।
दिनेश राउतले निर्देशन गर्ने ‘महाभोज’को मुख्य कलाकारहरूमा दयाहाङ राई, खगेन्द्र लामिछाने, आर्यन सिग्देल,अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, र वीरेन्द्र सिंह कुशवाह लगायत छन् ।
चलचित्रको छायाङ्कन पोखरा तथा आसपासका क्षेत्रमा करिब ४५ दिनसम्म चल्ने बताइएको छ । निर्माण टोली बुधवार पोखरा जाने तयारीमा रहेको छ ।
निर्देशन राउतको यो आठौँ चलचित्र हो । यस चलचित्रलाई उनले आफ्नो महत्त्वाकाङ्क्षी प्रोजेक्टका रूपमा लिएका छन् ।
उनका अनुसार ‘महाभोज’को कथा समाजमा हुने विश्वासघात र भ्रष्टाचारविरुद्धको हो । “यो चलचित्र नागरिकको न्याय, पारदर्शिता र सामाजिक जागरणको महत्त्वलाई उजागर गर्ने प्रयास हो । समाजमा हुने अन्याय र प्रणालीविहीन कामहरूविरुद्ध जब नागरिक आवाज उठाउँछन्, त्यसले ल्याउने परिवर्तन चलचित्रमा देखाइनेछ,” राउतले बताए ।
चलचित्र क्लक वर्क क्रियशन र पिक्चर फ्रेमको ब्यानरमा निर्माण हुनेछ । यो सिनेमाका निर्माता हिमाल कडरिया हुन्, जसले यसअघि ‘नाङ्गो गाउँ’ र ‘दुखी आत्मा’ जस्ता चलचित्र निर्माण गरेका थिए । कार्यकारी निर्माताहरूमा किरण नेपाली र सुदिप ढकाल छन् ।
विकास सुवेदीको कथा रहेको चलचित्रको छायांकन राजेश श्रेष्ठले गर्नेछन् भने सम्पादन निमेष श्रेष्ठको गर्नेछन् । नेपालमा चलचित्रको वितरण काफिया फिल्म्स र कुबेर सिने डिस्ट्रिब्युसनले गर्नेछन् ।
