काठमाडौं । गायिका एलिना चौहानले पति विष्णु सापकोटासँग डिभोर्सका लागि जिल्ला अदालत काठमाडौंमा मुद्दा दर्ता गरेकी छिन् ।
एलिनाले विष्णुसँगको १० महिना लामो वैवाहिक जीवनलाई टुंग्याउने निर्णय गरेकी हुन् । उनले विवाहपछिका विभिन्न उतारचढावपछि सम्बन्ध टुंग्याउने निर्णय लिएको बताएकी छन् ।
गायिका चौहानले आफ्नो डिभोर्सका विषयमा आएका समाचारलाई लिएर मुखखोल्दै विष्णुसँग हतारमा विवाहको निर्णय लिएको र अहिले सहमतिमै डिभोर्स गर्न आँटेको प्रष्टोक्ति दिएकी छन् ।
सामाजिक सञ्जालमा लाइभ गर्दै एलिनाले डिभोर्स कुनै सहज निर्णय नभएको स्पष्ट पार्दै यसबारे कसैलाई पनि गाली नगर्न आग्रह गरेकी छन् ।
एलिनाले आफूहरू दुईजना र परिवराले सोचेरै सम्बन्धविच्छेद गर्ने निर्णय लिएको बताएकी छन् । उनले राम्रोसँग कुरा गरेर छुटेको समेत उल्लेख गरेकी छन् । साथै, एलिनाले आफ्नो सम्बन्धको क्रममा धेरै चुनौतीहरू रहेको र अनुभवबाट सिकेर नयाँ जिन्दगी सुरुवात गर्न चाहेको बताउँदै आफ्नो निर्णयलाई अनावश्यक विवादित नबनाउन आग्रह गरेकी छन् ।
एलिनाको भनाइ जस्ताको त्यस्तै:-
आफ्नो व्यक्तिगत विषयमा त्यति बोल्न मन लाग्दैन । यो विषयमा म आज पहिलो पटक बोल्दै छु ।
कुनै पनि बाबुआमाले मुटु फुटाएर कन्यादान गरेको छोरीको डिभोर्स कदापि चाहँदैनन् । झन् नेपालजस्तो देशमा त एउटा छोरीका लागि एकदमै अप्रिय हुन्छ । हामीले एकदम सोचेर लिएको डिसिजन हो । दुई जनाले सल्लाह गरेर परिवारबीच कुरा भएर डिसिजन लिएका छौँ । अदालतको कुरा भित्रबाट कसरी बाहिर आयो भन्ने मलाई थाहा छैन ।
कतिपय कुरा इच्छाभन्दा पनि आवश्यकता हुन्छ । मनमुटाब हुँदाहुँदै सम्बन्धलाई निरन्तरता दिँदा पछि दुर्घटना हुन सक्छ । हाम्रो प्रेम विवाह भएको हो । बिहे गर्नु हतारको डिसिजन थियो । प्रेममा हुँदा पनि हामीबीच खटपट परिराख्थ्यो । मैले सोचेँ– विवाह गरेपछि सबै ठिक हुन्छ । उहाँले पनि यत्तिको केटीसँग जिन्दगी बिताउन सकिन्छ भन्ने सोच्नुभयो ।
समय बित्दै जाँदा मैले सहन सकिनँ र उहाँले पनि सोचेजस्तो भएन । मैले उहाँको एक्सपेक्टेसन पूरा गर्न सकिनँ । आफूले माया गरेका मान्छेलाई अरूले गाली गर्दा आफूलाई नै गाली खाएभन्दा बढी पिडा हुँदो रहेछ । अहिले मलाई साथ दिन्छु भन्ने सोचिरहनुभएको छ भने साथ दिनुस् । तर उहाँलाई नराम्रो नभन्नुहोला । बरु मलाई गाली गर्नुस् । जिन्दगीमा कस्तो कस्तो भोगियो । म त खरानी भइसकेको मान्छे, आगोसँग डर लाग्दैन । मेरो जिन्दगी बिगार्ने जिम्मेवार म आफैँ हो । हामीले जानी–जानी बिहे गरेको हौँ । उहाँले म कलाकार हो भन्ने थाहा भएरै, मेरो आनीबानी जानेरै बिहे गर्नुभएको हो । पछि योभन्दा पनि नराम्रो सिचुयसन नआओस् भनेर राम्ररी कुरा गरेर नै छुटेको हो ।
दह्रो पनि कति हुनु । म के भइसकेँ समझमै आएको छैन । अनुभवबाट सिकेर नयाँ सुरुवात गर्न चाहन्छु । तपाईँहरूले सहयोग नगर्न नसके पनि वाधा नपुर्याउनुहोला । मेरो नम्बर छरपस्ट भएको छ । फोन आएको आएै छ । हाम्रो जिन्दगीको डिसिजन लिने अधिकार छ हामीलाई छ । बाँच्ने अधिकार छ । भोलि उहाँलाई केही भइहाल्यो भने मलाई झन् गाह्रो हुन्छ, त्यसले मलाई बाँच्न दिँदैन । त्यसैले उहाँलाई नराम्रो नभन्नुहोला ।
मेरोजस्तै आमाबाबु सबै छोरीहरूको होस । व्यक्तिगत कुरालाई मजाकको पात्र नबनाउनुहोला । कमाइ खाने भाँडो नबनाउनुहोला ।
