दिनेश राउतले निर्देशनमा निर्माण भएको चलचित्र ‘महाभोज’ को छायाकंन सम्पन्न भएको छ ।
सामाजिक र राजनीतिक विषयवस्तुमा आधारित रहने सिनेमाको पोखरा आसपासका क्षेत्रमा ३७ दिन र बाँकी काठमाडौंको दृश्य खिचिएसँगै करिब ४० दिन लगाएर इन्डकल्याप गरिएको हो ।
चलचित्रमा खगेन्द्र लामिछाने, दयाहाङ राई, आर्यन सिग्देल, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, देशभक्त खनाल, आभा अर्याल र वीरेन्द्र सिंह कुशवाहलगायतका कलाकारको अभिनय रहेको छ ।
चलचित्रले सर्वसाधारणको जीवन र भरोसामाथि खेलबाड गर्नेविरुद्धको विद्रोहीको कथा भन्ने निर्माणपक्षले बताएको छ । निर्देशन राउत अनुसार ‘महाभोज’मा नागरिकको न्याय, पारदर्शिता र सामाजिक जागरणको महत्त्वलाई उजागर गर्ने प्रयाससँगै समाजमा हुने अन्याय र प्रणालीविहीन कामहरूविरुद्ध जब नागरिक आवाज उठाउँछन्, त्यसले ल्याउने परिवर्तन देख्न पाइनेछ ।
निर्देशन राउतको यो आठौँ चलचित्र हो । यस सिनेमालाई उनले आफ्नो महत्त्वाकाङ्क्षी प्रोजेक्टका रूपमा लिएका छन् ।
क्लक वर्क क्रियसन र पिक्चर फ्रेमको ब्यानरमा निर्माण भएको चलचित्रका निर्माता हिमाल कडरिया हुन्, जसले यसअघि चलचित्र ‘नाङ्गो गाउँ’ र ‘दुखी आत्मा’ निर्माण गरेका थिए । यो सिनेमाको कार्यकारी निर्मातामा किरण नेपाली र सुदिप ढकाल छन् ।
चलचित्रमा विकास सुवेदीको कथा तथा पटकथा रहेको छ । राजेश श्रेष्ठको छायाङ्कन रहेको चलचित्रको निमेष श्रेष्ठको सम्पादन , उत्तम न्यौपानेको ध्वनि डिजाइन, दिनेशबहादुर रावतको मुख्य सहायक निर्देशन रहेको छ ।
