काठमाडौं । फिल्म ‘होस्टल रिटर्नस’बाट हिरोका रुपमा फिल्ममा पाइला चालेका अभिनेता सुशील श्रेष्ठ यही फागुन २९ गतेबाट रिलिज हुने फिल्म ‘आउटलः दफा २१९’मार्फत दर्शकमाझ आउँदैछन् । पछिल्लो पटक फिल्म ‘लभ डायरिज’मा देखिएका सुशील चार वर्षपछि कमव्याक गर्न लागेका हुन् ।
फिल्मको रिलिज छेको नजिकिँदै जाँदा सुशील आफूलाई उत्साह र चुनौती दुवै भएको स्वीकार्छन् । ‘म पहिलोपटक एक्सन फिल्ममा देखिँदैछु । मैले यस्तो एक्सन अहिलेसम्म गरेको छैन । मैले फिल्मकै लागि मार्सल आर्ट सिक्दै गर्दा हातको औलाको लिगामेन्ट च्यातियो । म रेस्टमा बस्दा फिल्मको काम रोकिन्थ्यो । त्यसकारण रेस्ट नै नगरी फिल्मको काम गरें’, सुशील भन्छन् ।
सुशीलका अनुसार कानून हातमा लिएर अपराधलाई निर्मुल पार्ने चरित्रमा उनी देखएिका छन् । ‘देशको कानून नमान्ने व्यक्तिलाई आउटलका रुपमा चित्रण गरिएको छ । अर्थात ऊ कानून बाहिर छ । दफा २१९ ले जबरजस्ती करणी गर्ने व्यक्तिलाई कैदसजाय सँगै जरिवानाको पनि व्यवस्था गरिएको छ । तर कानून पालना नहुँदा पीडितले न्याय पाउन सकेको छैन’, सुशील आफ्नो चरित्रबारे भन्छन्, ‘देशको कानूनले न्याय दिन नसकिरहेको अवस्थामा कुनै दिन एउटा व्यक्ति जन्मन्छ, जसले कानून हातमा लिएर पीडितलाई न्याय दिन्छ । मेरो पात्रले न्याय दिन्छ ।’
सुशीलले फिल्मले महिलालाई माथि उठाउने दाबी गरे । ‘अधिकांश फिल्मले महिलालाई होच्याउने गरेको आरोप लाग्ने गरेको छ । तर यो फिल्मले महिलालाई माथि उठाएको छ’, उनी भन्छन् ।
विक्की महर्जनको लेखन तथा निर्देशनमा तयार भएको यो फिल्ममा अमित अग्रहरि र नीशा गुइडेको लगानी छ । फिल्ममा विक्की महर्जन र विनोद कठायतको पटकथा, नविन गुरुङको डीओपी छ ।
विकास चौधरी सह–निर्माता रहेको फिल्मका कार्यकारी निर्माता विनोद कठायत हुन् । साहिल खानको सम्पादन रहेको फिल्ममा चुल्ठे काजीको एक्सन निर्देशन छ ।
यो फिल्ममा सुशिल श्रेष्ठ, शिक्षा संग्रौला, नरेश पौडेल, सुमन भण्डारी, हेम महर्जन, सोनी लागुन, विशाल पहारी, महेश त्रिपाठी, मारिया कार्की र अयान परियारको अभिनय छ ।
