काठमाडौं । दिनेश राउतको निर्देशनमा निर्माण भएको चलचित्र ‘महाभोज’को फष्ट लुक पोष्टर सार्वजनिक गर्दै प्रदर्शन मिति घोषणा गरिएको छ ।
मल्टिस्टार कलाकार रहेको यो चलचित्र गणतन्त्र दिवसको अवसर पारेर आगामी जेठ १५ गते बिहीबार प्रदर्शनमा आउने भएको छ । निर्माणपक्षले मंगलबार सार्वजनिक गरेको पहिलो पोस्टरमा प्रमुख कलाकारहरूको गम्भीर र चुनौतीपूर्ण हाउभाउ छ ।
पोस्टरको पृष्ठभूमिमा नेपाली मुद्रा झल्किने डिजाइन गरिएको छ, जसले आर्थिक असमानता र सत्ताको प्रभावलाई सङ्केत गर्छ । पोस्टरको केन्द्रमा टोपी लगाएका पुरुषलाई देख्न सकिन्छ, जो अभिनेता आर्यन सिग्देल हुन्, उनले राजनीतिक वा प्रशासनिक व्यक्तित्वको प्रतिनिधित्व गर्न सक्छन् । उनका वरिपरि अन्य कलाकारहरू दयाहाङ राई, खगेन्द्र लामिछाने, अञ्जना बराइली, गौमाया गुरुङ र मलिका महत छन्, उनीहरूको अनुहारमा आक्रोश, पीडा, अन्याय, र सङ्घर्षका भाव देखिन्छ ।
सामाजिक तथा यथार्थपरक विषयमाथि बनेको ‘महाभोज’ चलचित्रलाई दिनेश राउतले निर्देशन गरेका छन्, यो उनको आठौँ चलचित्र हो ।
‘महाभोज’मा आर्यन, दयाहाङ, खगेन्द्र, अञ्जना, गौमाया, मलिका सहित वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाह लगायतका कलाकारहरूको अभिनय रहेको छ ।
क्लक वर्क क्रियशन र पिक्चर फ्रेमको संयुक्त निर्माणमा तयार भएको यस चलचित्रका निर्माता हिमाल कडरिया हुन् । यस सिनेमाको स्क्रिप्ट विकास सुवेदीले लेखेका हुन् ।
चलचित्रका छायाकार राजेश श्रेष्ठ हुन् भने सम्पादन निमेष श्रेष्ठको, ध्वनि डिजाइन उत्तम न्यौपानेको, मुख्य सहायक निर्देशन दिनेश बहादुर रावतको रहेको छ ।
मनोज जोशी निर्माण नियन्त्रक र सहायक निर्माण नियन्त्रक विदुर मानन्धर हुन् । साजन बस्ताकोटीको कला निर्देशन, रोयल भीमसेन र ट्राइडेन्ट कन्सेप्टको पब्लिसिटी डिजाइन, समरा जोशीको मेकअप तथा सरस्वती श्रेष्ठको केश स्टाइलिङ तथा आशिष पौडेलको कस्ट्युम डिजाइन रहेको छ ।
नेपालमा चलचित्रको वितरण काफिया फिल्म्स् र कुबेर सिने डिस्ट्रिब्युसनले गर्नेछन् । जेठ १५ गते नेपालसहित नेपालीहरू बसोबास गर्ने प्राय: सबै देशहरूमा एकसाथ रिलिज हुने निर्माणपक्षले जनाएको छ ।
